Psalms 7

መዝሙር ፡ ዘዳዊት ፤ ዘዘመረ ፡ ለእግዚአብሔር ፡ በእንተ ፡ ነገረ ፡
ኩዝ ፡ ወልደ ፡ አሚናዳብ ።
1እግዚኦ ፡ አምላክየ ፡ ብከ ፡ ተወከልኩ ፡ ወኢትግድፈኒ ፤
ወአድኅነኒ ፡ እምኵሎሙ ፡ እለ ፡ ሮዱኒ ፡ ወባልሐኒ ።
2ከመ ፡ ኢይምስጥዋ ፡ ከመ ፡ አንበሳ ፡ ለነፍስየ ፤
እንዘ ፡ አልቦ ፡ ዘያድኅን ፡ ወዘይባልሕ ።
3እግዚኦ ፡ አምላክየ ፡ እመሰ ፡ ከመዝ ፡ ገበርኩ ፤
ወእመኒቦ ፡ ዐመፃ ፡ ውስተ ፡ እደውየ ።
4ወእመኒ ፡ ፈደይክዎሙ ፡ ለእለ ፡ ይፈድዩኒ ፡ እኩየ ፤
ለያውድቁኒ ፡ ጸላእትየ ፡ ዕራቅየ ።
5ወይዴግና ፡ ፀራዊ ፡ ለነፍስየ ፡ ወይርከባ ፤
ወይኪዳ ፡ ውስተ ፡ ምድር ፡ ለሕይወትየ ።
ወያኅስሮ ፡ ውስተ ፡ መሬት ፡ ለክብርየ ።
6ተንሥእ ፡ እግዚኦ ፡ በመዐትከ ፤
ወተለዐል ፡ መልዕልቶሙ ፡ ለጸላእትየ ።
7ተንሥእ ፡ እግዚኦ ፡ አምላክየ ፡ በሥርዐት ፡ ዘአዘዝከ ።
ወማኅበረ ፡ አሕዛብኒ ፡ የዐውደከ ፤
8ወበእንተዝ ፡ ተመየጥ ፡ ውስተ ፡ አርያም ።
እግዚአብሔር ፡ ይኴንኖሙ ፡ ለአሕዛብ ።
9ፍታሕ ፡ ሊተ ፡ እግዚኦ ፡ በከመ ፡ ጽድቅከ ፤
ወይኩነኒ ፡ በከመ ፡ የዋሃትየ ።
10የኀልቅ ፡ እከዮሙ ፡ ለኃጥኣን ፤
ወታረትዖሙ ፡ ለጻድቃን ፤
ይፈትን ፡ ልበ ፡ ወኵልያተ ፡ እግዚአብሔር ።
11አማን ፡ ይረድአኒ ፡ እግዚአብሔር ፤
ዘያድኅኖሙ ፡ ለርቱዓነ ፡ ልብ ።
12እግዚአብሔር ፡ መኰንነ ፡ ጽድቅ ፡
ኀያል ፡ ወመስተዐግስ ፤
ወኢያምጽእ ፡ መንሱተ ፡ ኵሎ ፡ አሚረ ።
13ወእመሰ ፡ ኢተመየጥክሙ ፡ ሰይፎ ፡ ይመልኅ ፤
ቀስቶኒ ፡ ወተረ ፡ ወአስተዳለወ ።
14ወአስተዳለወ ፡ ቦቱ ፡ ሕምዘ ፡ ዘይቀትል ፤
ወአሕጻሁኒ ፡ ለእለ ፡ ይነዲ ፡ ገብረ ።
15ናሁ ፡ ሐመ ፡ በዐመፃ ፤
ፀንሰ ፡ ጻዕረ ፡ ወወለደ ፡ ኃጢአተ ።
16ግበ ፡ ከረየ ፡ ወደሐየ ፤
ወይወድቅ ፡ ውስተ ፡ ግብ ፡ ዘገብረ ።
17ወይገብእ ፡ ጻማሁ ፡ ዲበ ፡ ርእሱ ፤
ወትወርድ ፡ ዐመፃሁ ፡ ዲበ ፡ ድማሑ ።
እገኒ ፡ ለእግዚአብሔር ፡ በከመ ፡ ጽድቁ ፤
ወእዜምር ፡ ለስመ ፡ እግዚአብሔር ፡ ልዑል ።